Dit is ´n meisie!

Nog net voor die einde van die jaar het Kobus en Monica se baba gekom.

Dit is ´n pragtige gesonde dogtertjie met die naam Michelle.


Later meer maar hier is ´n eerste fototjie.

Kersfees 2007

Ons eerste Kersfees in Bad Bentheim en hierdie jaar is daar gelukkig weer ´n paar kinders by die huis. Maryna het vir ´n hele maand kom kuier uit Suid Afrika en André en Angelika het vanaf München gekom vir die week om Kersfees.

Monica en Kobus wag nog vir die baba in Nederland en Herman en Marda wag vir die Visum in London.

Daar was weer baie geskenke onder die boom en heerlike eetgoed was daar ook genoeg.

En op Kersdag was daar weer ´n feesmaal en ons het baie om oor dankbaar te wees.

Geseende Kersfees.

Aan almal wat ons ken en ons blog besoek wil ons ´n baie geseende Kersfees toewens.

Mag julle almal deel in die vreugde en vrede van Kersfees.

Dit is koud!

Die winter het toe tog nog na Bad Bentheim en omgewing gekom en ´n paar dae lank was dit bitterkoud. Ons het selfs ´n bietjie sneeu gekry maar dit het na drie dae ook weer gesmelt en ´n wit Kersfees sal ons hierdie jaar nie kry nie.

Ons het ´n draai in Holland gemaak en kon op die kanale loop wat toegevries was, lekker opwindend vir die kleintjies.

Die Kersfeesmaand begin.

Desember is koud en die dae is kort maar daar is baie atmosfeer en as die Kersfeesmarkte begin is daar altyd iets om te doen.
Ons was al by ´n paar Kersmusiek konserte, en die een was in ´n ou kerk hier naby met ´n koor van 90 lede en die Poolse staats symfonie orkes. Nie net die koue gee hoendervleis nie, maar ook die mooi musiek. En sovêr is die winter hier in Bad Bentheim nie baie koud nie.

Fred en Annabell uit München het kom kuier en ons het hulle die omgewing gewys en ´n Kersfeesmark besoek.

Bo op die kerktoring van Schüttorf:

Kleinseuns kuier alweer.

Ons het weer vir Marco en Thomas gaan haal om ´n paar dae by ons te kuier en om vir Kobus en Monica kans te gee om die babakamer reg te kry.
Dit was mooiweer en dan is ´n speelparkie altyd lekker.

In en om die huis is daar ook baie om te doen en daar is lekker gespeel met alles en nog wat.

Bad Bentheim Herfs

Omdat hierdie omgewing so baie bladwisselende woude het is die herfs hier iets besonders. Oorals waar ons ry of loop is die kleure pragtig en ´n mens sukkel om op te hou fotos maak want om elke draai is dit nog mooier. Dit sal egter nou gou verby wees want die volgende paar dae kry ons reen- en stormweer en dit sal die laaste blare van die bome laat val. Die winter is dus om die draai en die eerste sneeu is dalk ook nie meer ver nie.

Hier is ´n paar klein fototjies om ´n indruk te probeer gee maar die werklikheid is baie mooier.

Nog kinders kuier

André en Angelika het ook vir die eerste keer kom kyk waar ons bly en ook lekker met die seuntjies gespeel. Hulle hou van Bad Bentheim en kan verstaan hoekom ons gekies het om hier te kom woon.

Dit was ook Angelika se verjaarsdag. Kobus en Monica het weer die kinders kom haal en ook ons woud kom geniet.

Kleinkinders oppas

Dit was die herfsvakansie in Nederland en ook Marco se skool was toe.

Ons is die naweek na Kobus en Monica en het die twee seuns saamgebring hier na ons toe.

Hulle was baie tevrede om saam met ons te gaan, en ons almal het die week baie geniet met uitstappies en lekker herfsweer.

Kom Thomas, moenie agter raak nie!

Die seuntjies is baie lief en was tuis vanaf die eerste dag.

Deur die dag was dit uitstappies, speel, fietsry boeklees ens.

Teen die aand is dit badtyd, storietyd en dan droomland toe.

Die kinders het ons baie besig gehou en saans was ons amper net so moeg soos hulle maar dit was baie lekker en ons sal dit sekerlik weer wil doen.

´n Dag in Apeldoorn

Halfpad tussen Nootdorp in Holland en Bad Bentheim in Duitsland lê Apeldoorn en dit was Monica se plan dat ons elkeen ´n uur ry en dan kry ons mekaar daar vir ´n uitstappie met die kindertjies.

Dit was ´n heerlike herfsdag en veral die kinders het dit geniet om aapies van naby te sien.

Lekker om so naby aan mekaar te woon dat ons mekaar vir ´n daggie kan sien.

Dankie Monica vir ´n oulike gedagte en ´n lekker paar uurtjies saam.